Fazliddin Umarov Davlat soliq qo‘mitasi raisi o‘rinbosari etib tayinlandi

Prezident Shavkat Mirziyoyevning qaroriga asosan Fazliddin Karimovich Umarov Davlat soliq qo‘mitasi raisi o‘rinbosari lavozimiga tayinlandi, deya xabar bermoqda qo‘mita matbuot xizmati.

Fazliddin Umarov 2001-yili Toshkent davlat iqtisodiyot universitetini buxgalteriya hisobi va audit mutaxassisligi bo‘yicha tamomlagan. 2005—2006-yillarda Soliq akademiyasida davlat soliqlari va yig‘imlari mutaxassisligi bo‘yicha tahsil olib, magistr darajasini olgan.

U davlat soliq xizmati organlarida 16 yillik mehnat tajribasiga ega bo‘lib, 2006—2015-yillarda Davlat soliq qo‘mitasining turli tuzilmalarida bo‘lim boshlig‘i, boshqarma boshlig‘i lavozimlarida faoliyat yuritgan. 2015—2017-yillarda Moliya vazirligining Soliq va bojxona-tarif siyosati boshqarmasida sho‘’ba mudiri bo‘lib ishlagan.

Fazliddin Umarov 2017-yildan shu kungacha Hisob palatasining Qo‘shimcha daromad manbalarini aniqlash va xarajatlarni tahlil qilish axborot-tahlil sho‘basi bosh inspektori lavozimida ishlab kelayotgan edi.

Avvalroq Abdulla Azizov ham Davlat soliq qo‘mitasi raisiga o‘rinbosar etib tayinlangani haqida xabar berilgan edi.