Shavkat Mirziyoyev Toshkentdagi yerusti metrosi qurilishi bilan tanishdi (foto)

O‘zbekiston Prezident Shavkat Mirziyoyev Toshkent metropoliteni Sergeli yo‘nalishining qurilishi bilan tanishdi. Bu haqda Prezident matbuot xizmati xabar berdi.

Davlat rahbarining 2016-yil 29-noyabrdagi qaroriga muvofiq barpo etilayotgan bu yo‘l Toshkent shahri transport kommunikatsiyasining yana bir muhim tarmog‘i hisoblanadi. Loyihaning umumiy qiymati 82,6 million dollar bo‘lib, 7 kilometr temir yo‘l va 6 ta bekat qurilishi belgilangan. Sergeli yo‘nalishi Chilonzor yo‘nalishining “Olmazor” bekatiga ulanadi.

Shu tariqa katta aholiga ega Sergeli tumani shahar markazi va boshqa tumanlari bilan yana bir transport vositasi orqali bog‘lanadi. Jumladan, Sergelidan metroga o‘tirgan yo‘lovchi “Buyuk ipak yo‘li” bekatigacha almashmasdan yetib olishi mumkin.

Prezident “Olmazor” bekati yaqinida bo‘lib, qurilish ishlarining borishini ko‘zdan kechirdi. Sergeli tumanining rivojlanib borayotgani, yangi ko‘p qavatli uylar qurilayotgani nuqtai nazaridan bu metro yo‘nalishi ulkan ahamiyatga ega ekanini ta’kidladi. Yo‘lovchilarning metropolitengacha yetib olishi va metroda harakatlanishi uchun yaratiladigan sharoitlar bilan qiziqdi.

Shavkat Mirziyoyev Yashnobod tumaniga tashrif buyurib, yerusti halqa metrosining qurilishi bilan ham tanishdi.

Uzunligi qariyb 55 kilometr bo‘lgan mazkur transport tarmog‘ining umumiy qiymati 422 million dollardan ziyod. Loyiha besh bosqichda amalga oshirilishi belgilangan.

Bugungi kunda uning birinchi bosqichi — metropolitenning “Do‘stlik” bekatidan Qo‘yliq bozorigacha bo‘lgan 11 kilometrlik qismi qurilmoqda. Bu yo‘nalishda 7 ta bekat bo‘ladi.

Ayni paytda “Do‘stlik-2” va “Ohangaron” bekatlari qurib bitkazilgan.

Davlat rahbari yangi keltirilgan poyezdga chiqib, mazkur bekatlar oralig‘ida yurib ko‘rdi, bekatlarda yaratilgan sharoitlarni ko‘zdan kechirdi.

Bekatlar yo‘lovchilarga qulaylik yaratuvchi zamonaviy texnologiyalar, yo‘lkirani elektron to‘lash imkonini beruvchi turniketlar, eskalator bilan jihozlangan.

Qo‘yliq bozorigacha bo‘lgan yo‘lning qolgan qismida ham poydevorlar quyulib, tayanch ustunlar o‘rnatish yakunlangan. Balkalar o‘rnatish, bekatlar qurish ishlari davom etmoqda.

Loyihaning ikkinchi bosqichda Qo‘yliq bozori bilan “Olmazor” bekati bog‘lanadi. Uchinchi bo‘lib “Beruniy”, undan keyin “Bodomzor” bekatigacha bo‘lgan qism quriladi. So‘nggi bosqichda esa halqa metro yo‘li yana “Do‘stlik” bekatiga ulanadi.

Mavzuga doir: Shavkat Mirziyoyev metropolitenning Yunusobod yo‘nalishida olib borilayotgan qurilish ishlari bilan tanishdi (foto)