Navoiyda shifokorni tahqirlagan shaxslar 15 sutkaga qamaldi

Navoiy viloyatining Uchquduq tumanida tez yordam shifokorlarini tahqirlagan shaxslar 15 sutkalik qamoq jazosiga hukm qilindi. Bu haqda Bosh prokuratura matbuot xizmati rahbari Hayot Shamsutdinov “Daryo”ga ma’lum qildi.

Avvalroq Bosh prokuratura mazkur holat yuzasidan surishtiruv boshlangani, vaziyat Navoiy viloyati prokuraturasi nazoratida ekani haqida bayonot bergandi.

Xabar berilishicha, Uchquduq tumani ma’muriy sudi qaroriga ko‘ra, 1987-yil Buxoro shahrida tug‘ilgan K.H. va 1991-yil Samarqand viloyati Pastdarg‘om tumanida tug‘ilgan E.P. 15 sutkalik ma’muriy qamoq jazosiga hukm qilingan.

Qayd etilishicha, mazkur fuqarolar Ma’muriy javobgarlik to‘g‘risidagi kodeksning uchta moddasida nazarda tutilgan huquqbuzarliklarni sodir etganligi sababli ularga nisbatan jarima ham tayinlangan. Fuqaro K.H. muqaddam Jinoyat Kodeksining 168-moddasi (firibgarlik) bilan sudlangan.