Afg‘onistonda prezidentlik saylovlari dastlabki natijalarining e’lon qilinishi yana kechiktirildi

Afg‘onistonda sentabr oyida bo‘lib o‘tgan prezidentlik saylovlarining dastlabki natijalarining e’lon qilinishi yana kechiktirildi. Bu haqda Mustaqil saylov komissiyasi a’zosi Orang Zeb TOLO News telekanliga bergan intervyusida ma’lum qildi, deya xabar bergan “TASS”.

Zebning so‘zlariga ko‘ra, 14-noyabrga rejalashtirilgan saylovlarning dastlabki natijalarini e’lon qilish yana kechiktiriladi. Kechikishga saylovchilarning ovozlarini hisoblash masalalarida vaziyatning keskinlashgani sabab bo‘lgan.

Afg‘onistonda prezidentlik saylovlari 28-sentabrda o‘tkazilgan. Mustaqil saylov komissiyasining ma’lumoti bo‘yicha ularda jami 2,6 million afg‘onistonlik fuqaro ishtirok etgan. Ovoz berish boshlanishidan avval esa jami 9,7 million saylovchi ro‘yxatdan o‘tkazilgandi.

Dastlabki natijalar 19-oktabrda e’lon qilinishi lozim edi, biroq MSK raisi Havo Alam Nuristoniy ushbu muddatning 14-noyabrgacha kechiktirilishini bildirgan.

Saylov natijalarining e’lon qilinishi 14-noyabrdan qaysi sanaga ko‘chirilgani noma’lumligicha qolmoqda.