Hasanboy Do‘stmatov va Uzbek Tigers’ning eng kuchli uch bokschisi Qirol kubogi–2017 finalida jang qiladi

Tailand poytaxti Bangkok shahrida 6-aprel kuni boks bo‘yicha tashkil etilgan Qirol kubogi–2017 xalqaro turnirining yarim finallari bo‘lib o‘tdi.

Avvalroq musobaqada O‘zbekiston sharafini himoya qilayotgan yetti nafar bokschilan uch nafari – Jasurbek Latipov (-52 kg), Shahobiddin Zoirov (-56 kg) va Murodjon Ahmadaliyev (-60 kg) yarim finalga o‘z yurishini to‘xtatib, bronza medaliga ega bo‘lgani haqida xabar berilgandi.

“Sports.uz” nashrining ma’lum qilishicha, qolgan 4 nafar bokschi Qirol kubogi–2017 final yo‘llanmasiga ega chiqdi. -49 kilogramm vazn toifasida ishtirok etayotgan Hasanboy Do‘stmatov final yo‘llanmasi uchun kechgan bellashuvda KXDR vakili Kim Yun Songni katta ustunlik bilan mag‘lubiyatga uchratdi.

-64 kilogramm vazn toifasida ringga chiqayotgan Elnur Abduraimov yarim finalda hindistonlik Rohit Tokasni mag‘lubiyatga uchratgan bo‘lsa, og‘irligi -69 kilogramm bo‘lgan bokschilar bahsida Shahram G‘iyosov qatarlik Txarimalungan Txulasidan ustun keldi. -75 kilogramm vazn toifasida Isroil Madrimov yarim final jangida tailandlik Tirapong Deyeni yengdi.

“Daryo”ning Telegram’dagi rasmiy kanali — @toshqindaryo’ga a’zo bo‘ling!