Markaziy bank raisiga yangi o‘rinbosar tayinlandi

O‘zbekiston Prezidenti farmoniga asosan Behzod Hamroyev O‘zbekiston Markaziy banki raisining o‘rinbosari etib tayinlandi. Bu haqda Markaziy bank matbuot xizmati xabar berdi.

Yangi rais o‘rinbosari pul-kredit siyosati, monetar operatsiyalar, statistika va tadqiqotlar yo‘nalishlaridagi ishlarga rahbarlik qiladi.

Mazkur tayinlovga qadar Behzod Hamroyev Markaziy bankning pul-kredit siyosati departamenti direktori vazifasida ishlab kelayotgan edi. Behzod Hamroyev 1983-yilda Buxoro viloyatida tug‘ilgan, 2006-yilda Toshkent davlat iqtisodiyot universiteti hamda 2016-yilda Yaponiyada Siyosiy fanlar milliy institutini tamomlagan. U ekonometrika va statistika bo‘yicha magistr darajasiga ega.

Behzod Hamroyev o‘z mehnat faoliyatini O‘zbekiston Iqtisodiyot vazirligida boshlagan, Markaziy bank tizimida 2008-yildan buyon ishlaydi.