Ichki ishlar vazirining sobiq o‘rinbosari yangi lavozimga tayinlandi

Ichki ishlar vazirining jamoat tartibini saqlash bo‘yicha sobiq o‘rinbosari Muhiddin Jo‘rayev Qo‘qon shahar ichki ishlar organlari faoliyatini muvofiqlashtirish boshqarmasiga boshliq etib tayinlandi. Podpolkovnik Muhiddin Jo‘rayev 2014—2016-yillarda Mirzo Ulug‘bek tumani IIB boshlig‘i, 2016—2018-yillarda Sirdaryo viloyat IIB boshlig‘i lavozimlarida ishlagan.

U 2018-yilning dekabr oyi oxirida ichki ishlar vaziri o‘rinbosari lavozimiga tayinlangan edi. Shuningdek, 2019-yil iyulida O‘zbekiston futbol assotsiatsiyasi vitse-prezidenti lavozimini egallagan.

Polkovnik Muhiddin Jo‘rayev endilikda Qo‘qon shahar IIO FMB boshlig‘i sifatida faoliyat ko‘rsatadi.

“Daryo” muxbirining xabar berishicha, 11-fevral, seshanba kuni, viloyat hokimi Shuhrat G‘aniyev, viloyat huquq-tartibot idoralari rahbarlari tomonidan yangi rahbar keng jamoatchilikka tanishtirildi.

Eslatib o‘tamiz, Prezidentning 2019-yil 18-noyabrdagi qarori bilan Ichki ishlar vazirining jamoat tartibini saqlash bo‘yicha o‘rinbosari Muhiddin Jo‘rayev lavozimidan ozod qilingan edi.