Toshkentga uchib kelgan Janubiy Koreyadagi o‘zbekistonliklar 14 kunlik karantinga joylashtiriladi

Uzbekistan Airways aviakompaniyasining HY514 reysi Seuldan Toshkentga 1-mart kuni, Toshkent vaqti bilan soat 02:40 da Janubiy Koreyadagi O‘zbekiston fuqarolarining ilk guruhi qabul qilindi. Bu haqda “Daryo”ga Sog‘liqni saqlash vazirligi jamoatchilik bilan aloqalar bo‘limi rahbari Furqat Sanayev ma’lum qilgan.

Reys orqali kelgan jami 253 yo‘lovchi Sog‘liqni saqlash vazirligi Virusologiya ilmiy tekshirish institutining yuqumli kasalliklar bo‘yicha mutaxassis va epidemiolog-shifokorlari dastlabki tibbiy ko‘rikdan o‘tkazilgan.

Ma’lum qilinishicha, Seuldan olib kelinganlardan 182 nafari O‘zbekiston fuqarosi, 71 nafari xorijiy mamlakatlar fuqarosidir. Xorijiy fuqarolardan 49 nafari evakutsiya doirasida olib kelingan, 22 nafari esa tranzit yo‘lovchilardir.

Yo‘lovchilarning 231 nafari (182 o‘zbekistonlik va 49 nafari xorijiy davlat fuqarosi) maxsus tayyorlangan tibbiyot muassasasiga joylashtiriladi va ikki hafta davomida karantinda saqlanadi. 22 nafar tranzit yo‘lovchi esa belgilangan tartibda izolyatsiya qilinib, keyinroq Uzbekistan Airways aviakompaniyasi reysi orqali o‘z mamlakatiga uchib ketadi.