Toshkentda davolanayotgan koronavirusga chalingan 92 bemor O‘zbekistonning yetti hududidan. Qolgan 66 bemor — viloyatlarda

O‘zbekistonda koronavirus infeksiyasi bilan xastalangan 158 bemorning 5 nafari voyaga yetmagan bolalardir. Bu haqda Sog‘liqni saqlash vazirligi ma’lum qildi.

“Bemorlarning 73 nafari erkak, 85 nafari ayollar bo‘lsa, shundan 5 nafari voyaga yetmagan bolalardir”, — deyiladi vazirlik axborotida.

Toshkentdagi Virusologiya ilmiy-tekshirish instituti klinikasida davolanayotgan 92 nafar bemorning yetti nafari sog‘aygan, bir nafari vafot etgan.

Bemorlarning 73 nafari Toshkent shahridan, 2 nafari Buxoro, 2 nafari Qashqadaryo, 2 nafari Navoiy, 7 nafari Samarqand, 1 nafari Sirdaryo hamda 5 nafari Toshkent viloyatidan.

Qolgan 66 nafar bemor (shundan bir nafari vafot etgan) O‘zbekistonning turli hududlaridagi yuqumli kasalliklarga ixtisoslashgan shifoxonalarda davolanmoqda.

Mavzuga doir: O‘zbekistonda koronavirusga chalinganlar soni 158 nafarga yetdi