Gruziyada komendantlik soati joriy etildi

Gruziyada koronavirus pandemiyasi sabab komendantlik soati joriy etilmoqda. Bu haqda Gruziya bosh vaziri Georgiy Gaxariyaga tayanib, Tengrinews xabar berdi.

Ta’kidlanishicha, komendantlik soati kechki 21:00 dan ertalabki 06:00 ga qadar davom etadi. Ushbu vaqt oralig‘ida piyoda va transportda harakatlanish taqiqlanadi. Mazkur qaror 31-mart kuni soat 08:00 dan kuchga kirdi.

“Favqulodda holat vaqtida deyarli to‘liq karantin e’lon qilinadi. Soat 21:00 dan boshlab shaharlar va butun mamlakat bo‘ylab piyoda va tranportda harakatlanish taqiqlanadi”, — deydi bosh vaziri.

Shuningdek, karantin rejimi vaqtida 70 yoshdan oshgan qariyalarga ko‘chaga chiqish taqiqlanadi. Ular faqatgina yaqin atrofdagi oziq-ovqat do‘koni, dorixona yoki tibbiyot muassasasiga borishi mumkin.

So‘nggi ma’lumotlarga ko‘ra, Gruziyada koronavirus bilan kasallanganlar soni 98 kishiga yetgan.

Mavzuga doir: Saudiya Arabistonida komendantlik soati joriy etildi

Avvalroq Qirg‘izistonning yirik shaharlarida ham komendantlik soati joriy etilib, fuqarolarning kechki 20:00 dan keyin ko‘chaga chiqishi taqiqlangan edi.