APL klublari koronavirus tufayli 1,1 mlrd funt yo‘qotishi mumkin

Angliya Premyer Ligasi klublari futbolchilarni maoshning 30 foizidan voz kechishga yoki to‘lov muddatini kechiktirishga intilmoqda.

The Telegraph nashrining xabar qilishicha, futbolchilarga APL klublari koronavirus pandemiyasi tufayli yuzaga kelgan inqoroz paytida 1,1137 milliard funt yo‘qotishi mumkinligi aytilgan.

Premyer Liga futbolchilar uchun moliyaviy yo‘qotishlar hisolab chiqilgan maxsus prezentatsiya tayyorlagan. Agar mavsum o‘ynalmay qolib ketsa, tashkilot translyatsiyalar sabab 762 million funt yo‘qotadi. Bunga qo‘shimcha 200 million o‘yin kunlaridagi daromad, yana 175 million homiylik shartnomalaridagi yo‘qotishlar.

APL klublari futbolchilarning vakillariga o‘yinchilar maoshi klub xarajatlarining yarmini tashkil etishini ma’lum qildi. Hisob kitoblarga ko‘ra maoshning 30 foizga qisqarishi yoki to‘lov muddatining kechiktirilishi 570 million funt tejab qolishni ta’minlaydi. Bu umumiy — 1,137 milliard yo‘qotishning deyarli yarmini qoplaydi.

Liga klublari vaziyat o‘nglangach odatiy to‘lov tizimini yo‘lga qo‘yishga va’da bergan. Futbolchilar taklifni ko‘rib chiqishga rozi bo‘lgan.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!