Isroil hukumati aholiga Pesax bayramini 10-aprelgacha uydan chiqmay karantinda nishonlashni buyurdi
Isroil hukumati mamlakatda Pesax bayrami kunlari, ya’ni 7–10-aprelda to‘liq karantin e’lon qildi. Bu haqda Quddusdagi rezidensiyada mamlakat bosh vaziri Binyamin Netanyaxu e’lon qilgan.
“Mamlakat miqyosida 7–10-aprel kunlari soat 16:00 dan juma kuni 07:00 ga qadar karantin e’lon qilinadi”, — degan Isroil bosh vaziri.
Shuningdek, hukumat rahbari epidemiyaning boshlanishi ham Purim bayrami vaqtiga to‘g‘ri kelgani va o‘shanda 9-martdan 10-martga o‘tar kechasi kasallik tarqalishi boshlanganiga e’tibor qaratgan.
“Bir oy avval nima bo‘lganini hamma ko‘rdi. Qaytarib aytaman: Pesax Purim bayramiga aylanmasligi kerak. Bayramni uyingizda oila a’zolaringiz bilan nishonlang”, — degan Netanyaxu.
Bosh vazir nutqi davomida koronavirus bilan bog‘liq vaziyatning ijobiy jihatlari ham kuzatila boshlaganini bildirgan. U Pesax bayramidan keyin mamlakatdagi cheklovlar bosqichma-bosqich olib tashlanishini qayd etgan.
The Times of Israel nashrining yozishicha, endi cheklov me’yorlari mamlakat vazirlar mahkamasi tomonidan belgilab beriladi.
Isroil hukumati 10-mart kuni koronavirusning mamlakatga kirib kelishini oldini olish maqsadida xorijlik turistlarning davlat hududiga kirishini cheklab qo‘ygandi. Keyinchalik aholi vakillariga uydan chiqish ham taqiqlab qo‘yildi.
Mavzuga doir:
Bosh vazir Netanyaxuning o‘zi ikki marta koronavirusga test qilingan, ikkala tahlil natijasi ham salbiy deb topilgan.
Manba: Daryo.uz