Furqat tumanidan olib qochilgan “Jiguli” Qo‘qonning Furqat ko‘chasidagi karantin postida ushlandi

Qo‘qonda koronavirus infeksiya tarqalishining oldini olish maqsadida tashkil etilgan karantin postlarining birida avtomobil o‘g‘irlab ketayotgan shaxs qo‘lga olindi. Bu haqda “Daryo”ga viloyat IIB axborot xizmati ma’lum qildi.

Viloyatning Furqat tumanida yashovchi fuqaro K.E. 3-aprel kuni tuman IIBga murojaat qilib, hovlisidagi garajda turgan “Jiguli” (VAZ-2106) mashinasi noma’lum shaxs tomonidan o‘g‘irlab ketilganligini bildirgan.

Shu kuni Qo‘qon shahar Furqat ko‘chasida tashkil etilgan karantin postida shaharga kirishga uringan VAZ-2106 mashinasi to‘xtatilgan. Haydovchining shubhali harakatlaridan so‘ng, YPX inspektori mashina haqida surishtirgan.

Surishtiruv davomida Furqat tumanida yashovchi fuqaro E.K.ga tegishli ushbu mashinani uning mahalladoshi S.R. tomonidan olib qochilgani aniqlangan.

Holat yuzasidan Furqat tumani IIB huzuridagi Tergov bo‘linmasi tomonidan Jinoyat kodeksining 267-moddasi 1-qismi (transport vositasini olib qochish) bilan jinoyat ishi qo‘zg‘atilgan, S.R. qo‘lga olingan.

Mavzuga doir: Samarqandda avtomobil o‘g‘risi 6,5 yilga ozodlikdan mahrum etildi