Fransiyada koronavirusdan vafot etganlarning umumiy soni 18,6 mingdan oshdi

Fransiyada bir sutka ichida 17-aprel holatiga ko‘ra 761 nafar odam COVID-19’dan vafot etdi va mamlakatda koronavirus infeksiyasi sabab qayd etilgan o‘limlar soni 18 681 taga yetdi. Bu haqda Fransiya sog‘liqni saqlash bosh direksiyasi rahbari Jerom Salomon ma’lum qilgan.

16-aprel kuni mamlakatda koronavirus yuqtirib olganlar soni 108 847 nafarni tashkil qilayotgani, 17 920 nafar kishi kasallikdan vafot etgani haqida xabar qilingandi.

“Kasalxonalar va ijtimoiy tibbiyot muassasalarida 2020-yil 1-martidan beri koronavirusdan vafot etganlar soni 18 681 nafarni tashkil qilmoqda”, – deya ma’lumot bergan 17-aprel kuni bo‘lib o‘tgan brifingda Salomon.

U kasalxonalarda 11 478 nafar, ijtimoiy tibbiyot muassasalarida esa 7203 nafar bemorning kasallik sabab jon berganini qayd etgan.

Avvalroq Fransiya prezidenti Emmanuel Makron koronavirus pandemiyasi sabab joriy etilgan ijtimoiy yakkalash tartibining 11-mayga qadar uzaytirilganini e’lon qilgandi. Odamlarning mamlakat bo‘ylab harakatlanishiga qo‘yilgan cheklovlar 17-martdan beri amalda bo‘lib turibdi. Fransiyada kafe, restoran, kinoteatr, muzey, maishiy buyumlar do‘konlari, o‘quv muassasalari yopib qo‘yilgan. 11-maydan keyin bosqichma-bosqich bolalar bog‘chalari, maktablar va universitetlar qayta ochila boshlaydi.

Mavzuga doir: