O‘zbekistonning koronavirus qayd etilmagan hududlarida sanoat korxonalari va klasterlar o‘z ishini qayta boshladi

O‘zbekiston Prezidenti Shavkat Mirziyoyev 20-aprel kuni bo‘lib o‘tgan yig‘ilishda koronavirus aniqlanmagan hududlarda karantin cheklovlarini bosqichma-bosqich yumshatish yuzasidan topshiriq bergan edi.

Prezident tomonidan 22-aprel kuni o‘tkazilgan videoselektorda ma’lum qilinishicha, bugungi kunda virusdan xoli hududlardagi bir qator sanoat korxonalarida, qurilish maydonlarida, fermer va klaster xo‘jaliklarida, sanitar-epidemiologik normalarga qat’iy amal qilgan holda ishlar asta-sekin boshlandi.

Yig‘ilish chog‘ida Shavkat Mirziyoyev dalalarda, tomorqalarda ter to‘kib, halol mehnat qilayotgan dehqon va fermerlarga, klaster xo‘jaliklari rahbarlari va ishchi-xizmatchilarga minnatdorchlik bildirdi.

Mavzuga doir: Shavkat Mirziyoyev O‘zbekistonda koronavirusga qarshi kurashayotgan shifokorlar va kuch tuzilmalariga minnatdorchilik bildirdi

“Ayni paytda biz 34 millionli xalqimizni oziq-ovqat va boshqa zarur mahsulotlar bilan kafolatlangan holda ta’minlash, fuqarolar daromadlarining pasayib ketishiga yo‘l qo‘ymaslik, yordam va ko‘makka muhtoj yurtdoshlarimizni qo‘llab-quvvatlashdek g‘oyat dolzarb vazifani ham kechiktirmasdan hal qilishimiz kerak.

Buning uchun iqtisodiyotimizning yetakchi tarmoqlari barqaror ishlashi shart. Ko‘rinib turganidek, biz bir vaqtning o‘zida qator murakkab vazifalarni yechishimiz zarur”, — dedi davlat rahbari.

Mavzuga doir: Shavkat Mirziyoyev karantin davrida qurilish hajmi kamayishiga yo‘l qo‘ymaslik zarurligini ta’kidladi

Shuningdek, Prezident Shavkat Mirziyoyev 22-aprel kuni bo‘lib o‘tgan videoselektorda O‘zbekiston xalqini Ramazon bilan tabrikladi va koronavirusga qarshi kurashayotgan shifokorlar va kuch tuzilmalariga minnatdorchilik bildirdi