Rossiyada koronavirusga chalinganlar soni 106 ming kishidan, kasallikdan vafot etganlar esa 1000 kishidan oshdi

Rossiyada o‘tgan bir sutka ichida koronavirus bilan xastalangan 101 kishi vafot etdi. Mamlakatda kasallikdan vafot etganlarning umumiy soni 1073 kishiga yetdi. Bu haqda Kasallikka qarshi kurash bo‘yicha tezkor shtab xabar berdi.

Rossiyada qayd etilgan o‘limlarning uchdan ikki qismi yoki 611 tasi Moskva shahriga to‘g‘ri keladi. Undan keyingi o‘rinlarni Moskva viloyati 93 ta, Sankt-Peterburg 29 ta o‘lim holati bilan egallab turibdi. Shuningdek, Krasnodar o‘lkasida va Ingushetiyada 20 nafardan qurbon qayd etilgan. Qolgan hududlardagi qubonlar soni 20 nafardan kamroq.

So‘nggi bir sutkada Rossiyada 7099 kishida koronavirus aniqlangan. Mamlakatda kasallanganlarning umumiy soni esa 106 498 kishiga yetgan. Kasallikdan tuzalganlar soni esa 11 619 kishiga yetgan.

O‘tgan sutkada qayd etilgan yangi holatlarning 3093 tasi Moskvada, 793 tasi Moskva viloyatida, 336 tasi Sankt-Peterburgda, 158 tasi Dog‘istonda, 150 tasi Nijegorod viloyatida, 101 tasi Murmansk viloyatida aniqlangan. Qolgan hududlarda aniqlangan holatlarning soni 100 tadan kamroqni tashkil qiladi.

Eslatib o‘tamiz, Rossiya prezidenti Vladimir Putin koronavirus sabab e’lon qilingan ishlanmaydigan kunlarni 30-apreldan keyin yana uzaytirish to‘g‘risidagi farmonni imzolagan. Unga ko‘ra, Rossiyada ishlanmaydigan kunlar 11-maygacha cho‘zilgan.

Mavzuga doir: Rossiya mehnat vazirligi epidemiyadan keyin mamlakatda ishsizlar soni 6 millionga yetishi mumkinligini taxmin qildi