O‘zbekistonda aprel oyida karantin qoidalarini buzganlardan salkam 2,5 mlrd so‘m jarima undirildi

O‘zbekistonda karantin qoidalarini buzish va unga tutash bo‘lgan huquqbuzarliklarni sodir etganlik bo‘yicha aprel oyida 4 123 nafar shaxsga nisbatan jami 3 100 ta ma’muriy ish ko‘rib chiqildi. Bu haqda “Daryo”ga Oliy sud matbuot xizmati rahbari Aziz Obidov ma’lum qildi.

Ular Ma’muriy javobgarlik to‘g‘risidagi kodeksning 54-moddasi (Epidemiyalarga qarshi kurashish qoidalarini buzish), 183-moddasi (Mayda bezorilik), 194-moddasi (Ichki ishlar organlari xodimining qonuniy talablarini bajarmaslik) va 195-moddasi (Ichki ishlar organlari xodimlarining o‘z xizmat burchlarini bajarishlariga qarshilik ko‘rsatish) bilan javobgarlikka tortilgan.

Shundan 2 697 nafar shaxsga nisbatan jami 2 488 112 816 so‘m miqdorida jarima jazosi tayinlangan, 1 282 nafar shaxsga ma’muriy qamoq jazosi qo‘llanilgan.

92 nafar shaxs Ma’muriy javobgarlik to‘g‘risidagi kodeksning 21-moddasi (Huquqbuzarlikning kam ahamiyatliligi sababli ma’muriy javobgarlikdan ozod qilish) ga asosan javobgarlikdan ozod etilib, ogohlantirilgan.

Ma’muriy javobgarlik to‘g‘risidagi kodeksning 271-moddasi (Ma’muriy huquqbuzarlik to‘g‘risidagi ishlarni yuritishni istisno etuvchi holatlar)ga muvofiq 52 nafar shaxsga nisbatan ish tugatilgan.

Avvalroq O‘zbekistonda 1—20-aprel kunlari karantin qoidalarini buzgan 918 kishi sudlangani, ularning 421 nafari jami 246 million so‘m jarimaga tortilgani xabar berilgan edi.

Eslatib o‘tamiz, O‘zbekistonda karantin tartibi 10-mayga qadar uzaytirildi. 29-aprel kuni Shavkat Mirziyoyev O‘zbekistonda karantin cheklovlarini yengillashtirish bo‘yicha dastlabki choralarni ma’lum qildi. Unga ko‘ra, shahar va tumanlardagi ko‘p qavatli uylarning ichki hovli va hududlarida ota-onalar hamrohligida bolalarini sayr qildirishga, kunning ma’lum vaqtida shaxsiy avtomobillarida harakatlanishga ruxsat berildi.

Mavzuga doir: MIB: Karantinga olinganlarga nisbatan qo‘llanilgan ma’muriy jarimalarni to‘lash vaqti karantin tugagunga qadar uzaytirilgan