“El-Klasiko” vaqtida terrorchilik harakatini amalga oshirmoqchi bo‘lgan shaxs hibsga olindi

Barselona shahrida 8-may kuni terrorchilik guruhlariga aloqadorlikda gumon qilingan Marokash fuqarosi hibsga olindi.

La Sexta’ning xabar qilishicha, gumonlanuvchi shaxs “Barselona” — “Real” uchrashuvi kuni “Kamp Nou” atrofiga yig‘ilgan muxlislarni o‘ldirmoqchi bo‘lgan. U boshqa o‘yinlarni ham ko‘rib chiqqan, biroq “El-Klasiko” asosiy maqsadi bo‘lgan. Koronavirus pandemiyasi va joriy qilingan karantin uning rejalariga to‘siq bo‘lgan.

Nashrda ta’kidlanishicha, bu fuqaro IShID tomonidan yaratilgan va tarqatilgan ekstremistik ruhdagi videoroliklarga qiziqqan. O‘zining ijtimoiy tarmoqlari orqali u terrorchilik tashkilotlarini qo‘llab-quvvatlagan va g‘arbga bo‘lgan nafratini yashirmagan. Politsiya uni bir necha oy kuzatib borgan. U karantin qoidalarini buzganidan so‘ng qo‘lga olingan.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.