Toshkent shahrida aholi orasida ikki kishida koronavirus aniqlandi. Jami kasallanganlar soni 3089 nafarga yetdi

23 may soat 17:00 holatiga ko‘ra, O‘zbekistonda koronavirus infeksiyasi qayd etilganlar soni 3089 (+11) nafarni tashkil qilmoqda.

Yangi kasallanish holatlarining 1 nafari Dubay-Toshkent yo‘nalishidagi charter reysda kelgan, yana 1 nafari Qozog‘iston orqali yurtimizga kirib kelgan xalqaro yuk tashuvchi avtomashina haydovchisida qayd etildi.

Kasallik qolgan 9 holatda, jumladan, 2 holatda poytaxtimizda, 7 holatda esa Samarqandda aholi orasidan aniqlandi. Hozirda ushbu bemorlar bilan muloqotda bo‘lgan barcha fuqarolar belgilangan tartibda qat’iy karantinga olingan.

Ayni paytda yurtimizda 2525 nafar koronavirus infeksiyasiga chalingan fuqarolar butunlay sog‘aydi. Hozirda 551 nafar bemorga shifokorlarimiz tomonidan belgilangan standartlar bo‘yicha davo choralari ko‘rilmoqda.