Yevropa Chempionlar Ligasining hal qiluvchi o‘yinlari qayerda o‘tkazilishi ma’lum bo‘ldi

UEFA rahbariyati Yevrokuboklarning yakuniy bosqichi qayerda o‘tkazilishi borasida bir qarorga keldi, deya xabar bermoqda Sky Sport Italy.

Manbaga ko‘ra, Chempionlar Ligasi 1/4 finaldan boshlab Lissabon (Portugaliya)da o‘tkaziladi. 1/8 finalning qolgan javob bahslari esa odatdagidek mezbon jamoalar maydonida bo‘ladi.

Yevropa Ligasi esa Germaniya shaharlaridan birida o‘tkazilishi aytilmoqda.

Shuningdek, Yevropa Superkubogi o‘tkaziladigan joy ham ma’lum qilindi. Ushbu uchrashuvni Vengriyaning Budapesht shahri qabul qiladi.

Eslatib o‘tamiz, Chempionlar Ligasining chorak final bosqichiga PSJ, “Atletiko”, “Atalanta” va “Leypsig” klublari yo‘llanmani qo‘lga kiritib bo‘lgan. Yana to‘rt ishtirokchi esa 1/8 finalning to‘rtta javob uchrashuvidan so‘ng ma’lum bo‘ladi. Bular “Real” — “Manchester Siti” (birinchi o‘yin 1:2), “Chelsi” — “Bavariya” (0:3), “Lion” — “Yuventus” (1:0), “Napoli” — “Barselona” (1:1).

Mavzuga doir: Chempionlar Ligasi va Yevropa Ligasi formati o‘zgartirilishi kutilmoqda

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!