Eron AQShni Falastin masalasini “yo‘qqa chiqarish”ga urinishda aybladi

AQSh Falastin msalasini hal etish emas, yo‘qqa chiqarishga urinmoqda. Bu haqda Eronning BMTdagi doimiy vakili G‘ulomali Xushro‘y ma’lum qildi, deya xabar beradi “TASS”.

Munozaralar chog‘ida AQShning BMTdagi doimiy vakili Nikki Xeyli Xavfsizlik kengashi a’zolariga Falastin—Isroil mavzusi muhokamasidan chetga chiqib, “Yaqin Sharqdagi beqarorlikning bosh aybdorlari” — Eron va Livanning “Hizbulloh” guruhi faoliyatiga diqqatni jamlashni taklif etdi.

AQSh tashabbusiga izoh berar ekan, Xushro‘y Falastin masalasi va Isroil bosqini doim Yaqin Sharq bo‘yicha xalqaro bahslar markazida bo‘lib kelganini eslatdi.

“Bosqinchilardan boshqa hammani ayblab, AQSh muammoni hal etish emas, balki yo‘qqa chiqarishga urinmoqda. AQSh va Isroil Yaqin Sharqdagi barcha mojarolarning asosi bo‘lgan Falastin masalasini muhokama etishdan chetlashishga urinmoqda”, — deya ta’kidladi Eronning BMTdagi doimiy vakili. “Daryo”ning Telegram’dagi rasmiy kanali — @toshqindaryo’ga a’zo bo‘ling!