O‘zbekistonda karantin sharoitida qiyin ahvolga tushib qolgan xususiy ta’lim tashkilotlariga yordam beriladi

O‘zbekistonda karantin sharoitida qiyinchilikka duch kelayotgan tadbirkorlik subyektlarini davlat tomonidan qo‘llab-quvvatlash borasida tizimli chora-tadbirlar belgilandi. Bu haqda Respublika maxsus komissiyasining qarorida ko‘zda tutilgan.

Mutasaddilarga nodavlat ta’lim tashkilotlari (maktabgacha ta’lim tashkilotlari, maktablar, oliy ta’lim tashkilotlari) faoliyatini o‘rgangan holda, karantin cheklovlari joriy etilganligi munosabati bilan faoliyatida moliyaviy muammolarga duch kelayotgan nodavlat ta’lim tashkilotlariga har tomonlama amaliy yordam ko‘rsatish, shu jumladan, ushbu masala yuzasidan Vazirlar Mahkamasining alohida qarori tayyorlanadi.

Yirik tadbirkorlik subyektlariga karantin cheklovlari amal qilgan davrda tegishli ishlab chiqarish, xizmat ko‘rsatish va savdo obyektlarida sanitariya-gigiyena va epidemiologik talablarga rioya etilishi uchun mas’ul bo‘lgan xodim belgilash tavsiya etildi.

Eslatib o‘tamiz, O‘zbekistonda koronavirus bilan bog‘liq vaziyatning keskinlashayotgani sababli 10-iyuldan 1-avgustgacha mamlakatda qat’iy karantin choralari joriy etildi. Respublika maxsus komissiyasining 11-iyuldagi qarori bilan aholi o‘rtasida koronavirus infeksiyasining tarqalish zanjirini uzish maqsadida O‘zbekistonda navbatdagi karantin cheklovlari ma’lum qilindi.

Mavzuga doir: O‘zbekistonda karantin sharoitida daromad manbasini yo‘qotgan, ishsiz va ehtiyojmand oilalarga oziq-ovqat yetkazib beriladi