Toshkentda odamlarning plastik kartasidan 10 mln so‘mdan ortiq pulni o‘g‘irlagan 20 yoshli yigit fosh qilindi

Toshkent shahrida bankomat yonidan plastik kartadan pul yechib berish vaqtida yashirin ravishda SMS xabarnoma xizmatini o‘z raqamiga yoqtirib olib, kartalardagi mablag‘larni o‘zlashtirgan va ehtiyojlariga sarflab yuborgan 20 yoshli yigit qo‘lga tushdi. Bu haqda Tergov departamenti xabar berdi.

Xabarga ko‘ra, 20 yoshli I.M. 2020-yilning 29-mayidan 9-iyunigacha “Qo‘yliq dehqon bozori” hududida o‘rnatilgan bankomat yonida turib, plastik kartadagi pulni naqdlashtirish maqsadida kelgan jami 7 nafar fuqaroga pullarni naqdlashtirishda yordam berishini aytgan. Yigit ulardan plastik kartani olib, pullarni naqdlashtirish jarayonida, plastik kartaga ulanish SMS xabarnomasini o‘zining uyali telefon raqamiga yashirincha o‘rnatib olgan. Plastik karta raqami va maxfiy kodni uyali aloqa vositasiga saqlab olib, fuqarolarning plastik kartasi hisobidagi jami 10 million 497 ming 410 so‘m mablag‘ni yashirin ravishda egallab, o‘z ehtiyojlariga sarflab yuborgan.

Bektemir tumani IIO FMB 2-sonli IIB huzuridagi Tergov bo‘linmasi tomonidan mazkur holat bo‘yicha Jinoyat kodeksining 169-moddasi 3-qismi “a” bandi (O‘g‘irlik) bilan jinoyat ishi qo‘zg‘atilgan.

“I.M. dastlabki tergov jarayoniga ayblanuvchi tariqasida jalb qilingan. Tergov harakatlari yakunida jinoyat ishi, ayblov xulosasi bilan tegishliligi bo‘yicha sudga yuborilgan”, – deyiladi xabarda.

Mavzuga doir: 

Avvalroq Farg‘ona viloyatida fuqaro A.S.ning murojaati asosida Telegram’da firibgarlik qilib, 1 million 400 ming so‘m pulni o‘g‘irlagan jinoyatchi hibsga olingani, Telegram’da odamlarning 19 million so‘mdan ko‘proq pulini o‘g‘irlagan farg‘onalik 21 yoshli firibgar qo‘lga tushgani, 25-iyulda World Crypto Capital kompaniyasi rahbari Aleksey Meng O‘zbekistonda 2 mingdan ortiq fuqaroning jami 1,7 million dollarini qo‘lga kiritib, mamlakatdan chiqib ketgani xabar qilingan.