Video: 150 dan ortiq sovet avtomobillari o‘rin olgan tashlandiq kolleksiya

Rossiyalik videoblogerlar sovet davriga tegishli 150 ga yaqin turli modeldagi avtomobillar o‘rin olgan garajni topib oldi, deb xabar beradi Carakoom.

Garajdagi mashinalarning ayrimlari — juda noyob. Kolleksiyadagi avtomobillar holati turlicha. Ayrimlari qanchadir muddat oldin qayta tiklangan bo‘lsa, ba’zilari konveyrdan chiqqanidan buyon o‘z holatini o‘zgartirmagan, yana bir qismi esa — sochilib yotibdi.

Avtomobillar yonma-yon taxlangan bo‘lib, ularning ustida qalin chang qatlami mavjud. Shu bilan birga, ba’zi modellar yaxshi sharoitda saqlanishga haqli. Masalan, bu yerda “GAZ-22”ning bir nechta modeli joylashgan bo‘lib, u hozirgi kunda juda noyob hisoblanadi. Shuningdek, salkam 1100 nusxada chiqarilgan “GAZ-14” — “Chayka” ham mavjud.

Bundan tashqari, kolleksiyadan Lada Riva va “Moskvich-408P” ham o‘rin olgan — ularda rul qismi o‘ng tomonda joylashgan. Biroq ular orasida eng qadrlisi — Sobiq Ittifoq Oliy Kengashi prezidiumi raisi Leonid Brejnevning maxsus aloqa avtomobili vazifasini o‘tagan “ZIL-118K” mikroavtobusi. Taxminlarga ko‘ra, bu kabi avtomobil narxi 35 million rublga (490 ming dollar) baholanishi mumkin.

Videoda mazkur avtomobillar kolleksiyasi kimga tegishligi ekanligi to‘g‘risida ma’lumot berilmagan.

Avvalroq AQShdagi omborlarning biridan 2 ming nusxada ishlab chiqarilgan noyob Maserati topilgani to‘g‘risida xabar berilgandi.

Mavzuga doir: