Denovda ehtiyojmand oilalarga yordam puli tarqatilib, so‘ngra qaytarib olingani haqidagi xabarga tuman hokimligi munosabat bildirdi

Denov tumani hokimligi 2020-yilning 6-avgust kuni “Kun.uz” saytida e’lon qilingan “Denovda ehtiyojmandlarga pul tarqatilib, qaytarib olindi. Tushunmovchilik qayerdan kelib chiqqan?” sarlavhali material yuzasidan rasmiy munosabat bildirildi.

Hokimlikning ma’lum qilishicha, 2020-yilning 30-iyul kuni Denov tumanidagi ehtiyojmand va ijtimoiy himoyaga muhtoj 2 124 ta xonadonga 1 milliard 725 million 604 ming so‘m miqdorida bir martalik moddiy yordam puli tarqatilgan. Ushbu xonadonlarda 9 678 nafar fuqaro istiqomat qiladi. Ularning barchasi mahallalarda shakllantirilgan ehtiyojmand, ijtimoiy himoyaga va yordamga muhtoj oilalarning shaffof ro‘yxati – “temir daftar”ga kiritilgan xonadonlar hisoblanadi.

“Haqiqatan ham 3-sektor hududidagi ‘Zarafshon’ mahallasida ‘temir daftar’ga kiritilmagan, biroq mahalladagi ehtiyojmand oilalar ro‘yxatida bo‘lgan 9 ta xonadonga ham 500 ming so‘mdan yordam puli tarqatilgan. Mahalla mas’ullari ushbu mablag‘lar ‘temir daftar’ga kiritilgan fuqarolarga tarqatilishi kerakligini bilishganidan so‘ng, 9 ta xonadonga tarqatilgan moddiy yordam puli qaytarib olinib, ehtiyojmand xonadonlarga yetkazib berilgan.

O‘rganish natijasiga ko‘ra, ushbu 9 ta xonadon ijtimoiy himoyaga muhtoj ekanligi inobatga olinib, tuman ‘Saxovat va ko‘mak’ umumxalq harakati doirasidagi mablag‘lar hisobidan har bir oilaga 500 ming so‘mdan bir martalik moddiy yordam puli berildi”, – deyiladi hokimlik xabarida.

Avvalroq Sergelida muhtojlarga pul tarqatilishi masalasi ko‘tarilgani va mas’ullar aholi bilan uchrashgani haqida xabar berilgan edi.

Mavzuga doir: