Turkiyada tanishuv va to‘ylar haqidagi teleshoular taqiqlandi
Turkiya rasmiylari tanishuvlar va to‘ylarga bag‘ishlangan televizion shoular taqiqlanganini ma’lum qildi. Shuningdek, muxolifat bilan aloqadorlikda gumon qilingan 4 mingga yaqin davlat xizmatchisi ishdan bo‘shatildi, deb xabar beradi TJournal.
Hukumat televideniyedagi reklama va ko‘rsatuvlarda do‘st va turmush o‘rtog‘i qidirish malasi tilga olinishi mumkin emasligini belgiladi.
“Axloq-odob, oilaviy qadriyatlar va bolalar tarbiyasiga xizmat qiluvchi ko‘rsatuv va seriallarni rag‘batlantirish lozim”, — deyiladi hujjatda.
Turkiya bosh vazirining o‘rinbosari No‘mon Qurtulmush munosabatlar haqidagi ko‘rsatuvlar “oila institutidan voz kechishga chaqirishi, uni muqaddaslik va oliyjanoblikdan mahrum etishi”ni ta’kidlab o‘tdi.
Eslatib o‘tamiz, 29-aprel kuni Turkiyada “mamlakat prezidenti imijini qora ranglarda ko‘rsatish”da ayblanib Wikipedia taqiqlangan edi.