Amerikalik ayol Walmart do‘konidan xarid qilgan sumkasidan xitoylik mahbus maktubini topdi

AQShning Siyerra Vista ( Arizona shtati) shahrida yashovchi Lora Uolles qaynonasi Walmart tarmog‘i do‘konlaridan birida xarid qilgan sumkasida Xitoy tilida bitilgan maktub topib olganini ma’lum qildi. Bu haqda TJournal xabar bermoqda.

Ayol tanishidan maktubni tarjima qilib berishni so‘radi. Ma’lum bo‘lishicha, unda Xitoyning Guansi tumanidagi Inshan qamoqxonasi mahbuslari hayoti tasvirlangan ekan.

Maktub muallifiga ko‘ra, mahbuslar kuniga 14 soat, tanaffussiz, tungi 12 gacha ishlaydi. Bu vaqtgacha ishini tugatmaganlar kaltaklanadi. Ularga yog‘siz va tuzsiz ovqat beriladi, xastalikka chalinsa va dori-darmonga ehtiyoj sezsa, qiymati maoshidan ushlab qolinadi.

Noma’lum muallif maktubini “Xitoyda mahbus bo‘lish Amerikada ot, mol, qo‘y, cho‘chqa yoki it bo‘lgandan ham yomon” degan so‘zlar bilan yakunlagan.

Walmart vakillari maktubga izoh berishdan bosh tortdi va buni xatni chindan ham sumkani tayyorlagan xitoylik mahbus yozganini tasdiqlashning imkoni yo‘qligi bilan tushuntirdi. Ularning ta’kidlashicha, erkin mehnat kompaniya mahsulot yetkazib beruvchilar oldiga qo‘yadigan asosiy talablardan biri hisoblanadi.