Toshkent viloyatida ona yangi tug‘ilgan chaqalog‘ini ko‘chada qoldirib ketdi

Toshkent viloyatining Yuqorichirchiq tumanida ona yangi tug‘ilgan chaqalog‘ini ko‘chada qoldirib ketdi. Bu haqda viloyat prokuraturasi ma’lum qildi.

Aytilishicha, jinsi erkak bo‘lgan chaqaloq tumanning “Navoiy” mahallasi Ostona ko‘chasida qoldirilgan sumka ichida topilgan.

Olib borilgan tezkor-tergov harakatlari natijasida ushbu qilmishni sodir etgan 44 yoshli ayol kishining shaxsi aniqlangan.

Ma’lumotlarga ko‘ra, mazkur tumanda yashovchi M.S. farzandini o‘z uyida dunyoga keltirib, ikki kundan so‘ng uni ko‘chadagi yashash uylari yonida qoldirib ketgan.

Holat yuzasidan Jinoyat kodeksining 117-moddasi (xavf ostida qoldirish) bilan jinoyat qo‘zg‘atilgan, tergov harakatlari o‘tkazilmoqda.

“Daryo” yangiliklarini “Odnoklassniki”da kuzatib boring