Pekinda poyezdlari mashinistsiz boshqariladigan metropoliten yo‘nalishi sinovdan o‘tkazilmoqda

Xitoy poytaxtida joriy yilda poyezdlari mashinistsiz boshqariladigan ilk metropoliten yo‘nalishi ishga tushiriladi. Bu haqda “TASS” xabar bermoqda.

Pekinda bugun, 20-sentabr kuni avtomatik ravishda ishlaydigan yo‘nalishni sinovdan o‘tkazish boshlandi. Robot-poyezdlar Fanshan uyezdini shahar markazi bilan bog‘laydigan 16,6 kilometrlik  “Yanfan” temir yo‘l tarmog‘ida xizmat ko‘rsatadi.

Shuningdek, Pekinda ilk tezyurar tramvay yo‘nalishi hamda magnit yostiqcha ustida harakatlanadigan poyezdning ilk yo‘nalishi ham sinovdan o‘tkazilmoqda. Poyezd harakati Shanxaydagi tezyurar yo‘nalishdan farqli ravishda o‘rtacha tezlikda amalga oshiriladi.

Ma’lumot uchun, Shanxay metrosi uzunligi bilan dunyoda birinchi o‘rinda turadi. Ro‘yxatning ikkinchi o‘rnini esa Pekin metrosi egallagan.

“Daryo” yangiliklarini Facebook’da kuzatib boring