Abdulla Aripov va Vagit Alekperov Hisor konlar guruhini ishga tushirish marosimida ishtirok etdi

O‘zbekiston bosh vaziri Abdulla Aripov va “Lukoyl” prezidenti Vagit Alekperov Hisor konlar guruhini ishga tushirish tantanali marosimida ishtirok etdi. Bu haqda kompaniya matbuot xizmati ma’lum qildi.

Rossiya kompaniyasi “Janubi-G‘arbiy Hisor” loyihasi doirasida yiliga 4,4 milliard kub metr gazni kompleks tayyorlash qurilmasi, gazni boshlang‘ich tayyorlash qurilmasi va 6 ta gaz to‘plash punktini foydalanishga topshirdi.

Obyektlarning ishga tushirilishi Hisor konlar guruhida gaz ishlab chiqarishni loyihada ko‘zda tutilgan yiliga 5 milliard kub metrga chiqarish imkonini berdi.

“Lukoyl” matbuot xizmatiga ko‘ra, kompaniya xorijda qazib oladigan tabiiy gazning yarmidan ortig‘i O‘zbekiston hissasiga to‘g‘ri keladi. Joriy yil sentabri holatiga kompaniya loyihalari doirasida mamlakatda qazib olinadigan gaz miqdori 45 milliard kubometrga yetdi.

“Daryo” yangiliklarini Facebook’da kuzatib boring