O‘z uyida mag‘lubiyat nima ekanini bilmayotgan “Navbahor” futbolchilari paxta dalasiga chiqarildi

Namanganning “Navbahor” klubi futbolchilari 28-sentabr kuni paxta dalasiga chiqarildi. Bu haqda klub matbuot xizmati xabar berdi.

Bunda futbolchilarga jamoa bosh murabbiyi Ilhom Mo‘minjonovdan tortib, barcha ishchi-xodimlargacha ko‘maklashmoqda. Shuningdek, stadion ma’muriyati ham paxta dalasiga chiqqan. Futbolchilar payshanba kuni bu ishga qo‘l urgan bo‘lsa, qolgan ishchi xodimlar dam olish kunlari paxta dalasi bilan yuzlashadi.

Paxtani nes nobud qilmay terishda fermerlarimizga hasharchilar yaqindan yordam berib kelishmoqda, deb yozgan “Navbahor” matbuot xizmati.

“Navbahor” Oliy Liganing 23-turida Toshkentning “Paxtakor” klubini qabul qiladi. Ayni paytda Namangan klubi mavsum davomida uy uchrashuvlarini boy bermagan Oliy Liganing yagona a’zosi bo‘lib turibdi.

“Daryo” yangiliklarini Facebook’da kuzatib boring