Nokautchi bokschi Shohjahon Ergashev AQSh vizasini oldi. U tez orada Las-Vegasga uchadi

Tayyorgarlikni Rossiya poytaxti Moskvada olib borayotgan o‘zbekistonlik bokschi Shohjahon Ergashev AQSh vizasini qo‘lga kiritdi. Bu haqda “Olamsport” bokschi bilan suhbatdan so‘ng ma’lumot berdi.

AQShning mashhur Showtime telekanali bilan shartnoma imzolagan Shohjahon Ergashev avgust oyining boshidayoq okean ortiga yetib borishi rejalashtirilgan bo‘lib, uning jang sanasi va raqibi ham oshkor etilgandi. Biroq Toshkentda payti bokschi AQSh vizasini o‘z vaqtida ololmadi.

Charm qo‘lqop ustasining ma’lumot berishicha, rasmiyatchilik bilan bog‘liq muammolar o‘z yakuniga yetgan va u 12-oktabr kuni AQShning Detroytiga uchadi. Ko‘p o‘tmay esa Las-Vegasga yetib keladi.

Shohjahon Ergashev professional boksda 10 ta jang o‘tkazgan bo‘lib, ularning barchasida raqiblarini nokaut qilishga erishgan. Uning navbatdagi jangi dunyo boks markazida o‘tadi.

“Daryo” yangiliklarini “Odnoklassniki”da kuzatib boring