Muddatli harbiy xizmatni o‘tayotganlarni o‘qishga kirishga tayyorlashadi

Vazirlar Mahkamasi “O‘zbekiston Respublikasi Qurolli Kuchlari safida muddatli harbiy xizmatni o‘tayotgan harbiy xizmatchilarning ma’naviy-ma’rifiy, madaniy saviyasi va bilimlarini muntazam oshirib borish tizimini takomillashtirishga doir qo‘shimcha chora-tadbirlar to‘g‘risida”gi qarorni imzoladi, deb yozadi Norma.

Harbiy xizmatchilarning ma’naviy-ma’rifiy, madaniy saviyasi va bilimlarini muntazam oshirib borish uchun bir qator vazifalar belgilandi:

harbiy xizmatchilarning oliy ta’lim muassasalariga kirishga tayyorgarlik ko‘rishlari uchun har yili may-dekabr oylarida jami o‘quv yuklamasi 190 soatdan iborat bo‘lgan mashg‘ulotlar o‘tkazish dasturini ishlab chiqish;

har bir harbiy qismda tashkil etiladigan mashg‘ulotlar bo‘yicha 5 ta fandan ko‘p bo‘lmagan fan yo‘nalishlarini aniqlash;

har bir harbiy qismga unga yaqin joylashgan oliy, o‘rta maxsus va kasb-hunar, o‘rta ta’lim muassasasini biriktirishni ta’minlash va mazkur ta’lim muassasalaridan mashg‘ulot o‘tkazuvchi o‘qituvchilarni tayinlash;

ta’lim muassasalarining axborot-resurs markazlari imkoniyatlaridan foydalanish uchun harbiy qism kutubxonalarini ushbu ta’lim muassasalarining ARMtarmoqlariga ulash;

harbiy qismlarga biriktirilgan ta’lim muassasalarining ARMlari imkoniyatlaridan keng foydalanish maqsadida aholi punktidan 50 km dan uzoqda joylashgan harbiy qismlar kutubxonalarida elektron bazalar tashkil etish.

“Daryo”ning YouTube’dagi rasmiy sahifasiga obuna bo‘ling