Suv ustidagi masjid — Malayziyaning Malakka shahri timsoli (foto)

“Elektron minbar” nashri Malayziyaning Malakka shahridagi suv ustiga qurilgan masjid haqida hikoya qildi.

Malakkada masjidlar ko‘p, ammo indo-musulmon me’morchiligini o‘zida mujassamlashtirgan, noodatiy masjidlar ichida shaharning haqiqiy timsoli — Salot masjidi yoki Malakka bo‘g‘ozi masjidini qayd etish kerak, deyiladi xabarda. U qit’a bilan 30 metrli ko‘prik yordamida bog‘langan Pulau Melaka sun’iy oroli qirg‘og‘ida joylashgan.

Masjid dengiz qa’riga qoqilgan qoziqlarga tayanib turadi. Unga kirish uchun esa kichik ko‘prikdan o‘tish kerak.

Masjid to‘rt yil davomida qurilgan va 2006-yilning noyabrida ochilgan.

Masjidning 30 metrli minorasi alohida turibdi, u o‘zining asosiy vazifasidan tashqari, mayoq vazifasini ham o‘taydi. Masjid ichida, shuningdek, ta’lim markazi va kutubxona ham bor.