O‘rtachirchiqda mast qaynota u bilan birga ichgan kuyoviga pichoq urdi

Toshkent viloyatining O‘rtachirchiq tumanida qaynota o‘z kuyoviga oshxona pichog‘i bilan tan jarohati yetkazdi. Bu haqda viloyat IIB matbuot xizmati xabar bermoqda.

Xabar berishlaricha, 6-noyabr kuni qaynota o‘z uyida kuyovi bilan birga spirtli ichimlik iste’mol qilgan. Orada ular janjallashib ketgan, oqibatda qaynota o‘z kuyoviga pichoq bilan tan jarohati yetkazgan.

“Jabrlanuvchi og‘ir tan jarohati olib shifoxonaga yotqizilgan”, — deyiladi Toshkent viloyati IIB axborotida.

Ma’lum bo‘lishicha, holat yuzasidan qaynotaga nisbatan Jinoyat Kodeksining 104-moddasi bilan jinoyat ishi qo‘zg‘atilgan.