Prof ringdagi barcha jangida zafar quchgan Qudratillo Abduqahhorov bugun Andijonda ringga chiqadi

O‘zbekistonlik charm qo‘lqop ustasi Qudratillo Abduqahhorov bugun — 18-noyabr kuni ringga ko‘tariladi. Unga o‘zbekistonlik boshqa bir bokschi Sherzod Alimjonov raqib bo‘ladi.

Jang Andijon viloyatining Xonobod shahrida bo‘lib o‘tadi, deb yozdi “Olamsport”. WBC Silver chempionlik kamari sohibi bo‘lgan Abduqahhorov mazkur jangidan keyin AQShga jo‘nab ketadi va okean ortida jahon chempionligi kamari uchun tayyorgarlik ko‘radi. Rejaga ko‘ra, chempionlik jangi yanvar oyida bo‘lib o‘tadi.

Qudratillo Abduqahhorov WBC reytingida 5-o‘rinni egallab turibdi. U professional boksda 12 ta jang o‘tkazgan bo‘lib, ularning barchasida zafar quchgan. Shularning 8 tasida raqiblarini nokautga uchratgan.