Wal-Mart’ga egalik qiluvchi oilaning boyligi deyarli bir kunda 14 milliard dollarga ortdi

Wal-Mart kompaniyasining boshqaruv aksiyalari paketiga egalik qiluvchi Uolton oilasining umumiy boyligi 16-noyabr, payshanba kuni salkam 14 milliard dollarga ortdi, deb xabar berdi Forbes.

Bunga Amerika savdo tarmog‘i o‘zining daromadi keskin oshgani hamda oxirgi chorakda onlayn sotuvlar hajmining 50% ga ortishi kuzatilgani haqida bergan ma’lumoti sabab bo‘ldi. Wal-Mart aksiyalari savdoning dastlabki uch soati ichida 3 foizga ko‘tarilib ketdi.

Texnologiyalar va innovatsiyalar kompaniyaning hisobotida asosiy mavzular bo‘lib xizmat qildi. “Biz internet-buyurtmalarni taqdim etuvchi punktlarimiz sonini oshirdik. Mobile Express Returns servisini ishga tushirdik va avtomatik taqdim etuvchi punktlarni sinovdan o‘tkazmoqdamiz. Shuningdek, do‘konlarimizdagi ayrim standart funksiyalarni avtomatlashtirishga harakat qilmoqdamiz”, — dedi Wal-Mart prezidenti va bosh ijrochi direktori Dag Makmillon.