Pekin yaqinida ro‘y bergan yong‘inda 19 kishi halok bo‘ldi

Pekin yaqinidagi Dasin tumanining Sinszyan qishlog‘ida 18-noyabr, kechki payt kuchli yong‘in ro‘y berdi. Bu haqda “TASS” xabar qilmoqda.

Xitoy markaziy televideniyesiga ko‘ra, yong‘in oqibatida kamida 19 kishi halok bo‘ldi, sakkiz kishi yaralandi.

Hodisa joyida 14 ta o‘t o‘chirish brigadasi va 34 ta texnika ishladi. Oradan ikki soat o‘tib alanganing ochiq manbalarini o‘chirishga muvaffaq bo‘lindi.

Jabrlanganlar kasalxonaga yetkazildi. Rasmiylar yong‘inni keltirib chiqargan sabablarni aniqlamoqda.