Amerikalik aktyor Devid Kessidi vafot etdi

1970-yillarda mashhur bo‘lgan amerikalik aktyor va xonanda Devid Kessidi Florida shtatidagi kasalxonada 67 yoshda vafot etdi, deb xabar beradi “TASS”.

“Devid o‘zini uzoq qiynagan og‘riqdan qutulib, qalbida xotirjamlik his etgan holda vafot etdi”, — deydi aktyorning vakili.

U shuningdek, shifokorlarga minnatdorchilik bildirdi va Kessidi yaqinlari qurshovida vafot etganini ta’kidladi.

Aktyor o‘tgan haftada ichki organlarining funksional yetishmasligi tashxisi bilan shifoxonaga yotqizilgan edi.

Devid Kessidi 30 dan ortiq film va teleseriallarda suratga tushgan. Yolg‘iz ona va uning rok-guruhga asos solgan besh o‘g‘li haqidagi “Partrij oilasi” serialidagi obrazi unga haqiqiy ma’nodagi mashhurlikni olib kelgan.