Sudan prezidenti Umar al-Bashir: AQSh mening mamlakatimni beshga bo‘lib tashlamoqchi

AQSh hukumati Sudanni beshta alohida davlatga bo‘lib tashlamoqchi. Bu haqda Sudan prezidenti Umar al-Bashir “RIA Novosti”ga bergan intervyusida aytib o‘tdi.

Al-Bashirning so‘zlariga ko‘ra, 2011-yili Janubiy Sudanning ajralib chiqishi AQSh tomonidan olib borilgan siyosat oqibatidir. Sudan prezidenti AQShning arab mamlakatlari ichki ishlariga aralashuviga qarshi ekanini bildirdi.

“Bizda shunday ma’lumot bor: agar munosib himoyalanish yo‘lini topmasak, Sudan AQSh tomonidan beshta davlatchaga ajratib tashlanadi”, — dedi Umar al-Bashir. Uning qo‘shimcha qilishicha, Sudan “AQShning katta bosimi va fitnasi” bilan yuzma-yuz kelmoqda.

Umar al-Bashirning so‘zlariga ko‘ra, AQSh so‘nggi vaqtlarda “arab dunyosini izdan chiqarib yubordi”. Sudan davlat rahbari o‘z gapi tasdig‘i sifatida Afg‘oniston, Iroq, Suriya va Yamandagi vaziyatni misol keltirdi.