Tramp KXDRga qarshi yangi sanksiyalar joriy etilishini ma’lum qildi

AQSh prezidenti Donald Tramp Shimoliy Koreyaga qarshi yangi sanksiyalar joriy etilishini ma’lum qildi. Bu haqda “RIA Novosti” xabar bermoqda.

“Hozirgina XXR raisi Si Szinpin bilan Shimoliy Koreyaning provokatsion xatti-harakatlari yuzasidan gaplashdim. KXDRga qarshi qo‘shimcha va keng miqyosli sanksiyalar bugunoq joriy etiladi. Vaziyat nazorat ostiga olinadi!” — deb yozdi Tramp Twitter’dagi sahifasida.

Yangi sanksiyalar nimadan iborat bo‘lishini Oq Uy rahbari aniqlashtirib o‘tmadi.

Keyinroq AQSh davlat kotibi Reks Tillerson Vashington qo‘shimcha choralarning katta ro‘yxatiga ega ekanligini ta’kidlab o‘tdi.

Eslatib o‘tamiz, KXDR  2,5 oy davom etgan “sukut”dan so‘ng yana ballistik raketa uchirdi.