Peterburglik erkak 4 marta tez yordamdan rad javobi oldi va vafot etdi

Rossiyaning Sankt-Peterburg shahrida bir erkakning o‘limidan so‘ng jinoiy ish qo‘zg‘atildi. Unga ko‘ra erkakning rafiqasi tez tibbiy yordam shifokorlarini chaqiruvga kelishga ishontira olmagan va natijada erkak vafot etgan. Bu haqda Sankt-Peterburg prokuraturasi tomonidan ma’lum qilingan.

Xabar berilishicha, 16-noyabrga o‘tar kechasi bemor erkakning rafiqasi to‘rt marta tez yordamga qo‘ng‘iroq qilgan. Barcha qo‘ng‘iroqlar ikki nafar navbatchi feldsher tomonidan uzib qo‘yilgan. Ular ertalab hudud bo‘yicha mas’ul shifokorni chaqirishni tavsiya qilish bilan chegaralangan.

Bu harakatlar erkakning o‘limiga olib kelgan, chunki unga tibbiy yordam chaqiruvdan 10 soat o‘tgach ko‘rsatilgan.

Tergov qo‘mitasining hududiy boshqarmasi ma’lumotlariga ko‘ra, erkak bezgakdan shikoyat qilgan. U 16-noyabr kuni kunduzi kuchli infeksion kasallikdan vafot etgan.