Rossiya Suriyada to‘laqonli harbiy-dengiz bazasini quradi

Suriyaning Tartus port-shahrida Rossiyaning to‘laqonli harbiy-dengiz bazasi tashkil etiladi. Bu haqda, Rossiya Harbiy-dengiz floti Bosh shtabi sobiq boshlig‘i admiral Viktor Kravchenkoga asoslanib, “Interfaks” xabar bermoqda.

“Bu Rossiya flotining O‘rtayer dengizidagi tezkor imkoniyatlarini va umuman Rossiyaning Yaqin Sharqdagi mavqeini oshiradi”, — deydi Kravchenko.

Uning qayd etishicha, bungacha Tartusda Rossiyaning moddiy-texnik ta’minot shoxobchasi mavjud edi, “bu bir kichik hudud edi, uni kengaytirish orqali harbiy-dengiz bazasi tashkil etiladi”.

“Baza ancha katta hududni o‘z ichiga oladi, unda barcha turdagi muhofaza va mudofaa ko‘rinishlari bo‘ladi, unga istalgan kema — hatto birinchi rangga oid kreyserlar ham kira oladi. Ular o‘z zaxiralarini to‘ldirish, shaxsiy tarkib esa hordiq chiqarish imkoniga ega bo‘ladi”, — deydi Kravchenko.

“Interfaks”ning qayd etishicha, Rossiya prezidenti Vladimir Putin 13-dekabr, chorshanba kuni Rossiya parlamentiga Tartusdagi Rossiya harbiy-dengiz flotining moddiy-texnik ta’minot shoxobchasi hududini kengaytirish to‘g‘risidagi Suriya—Rossiya bitimini ratifikatsiya qilish to‘g‘risida taqdimnoma kiritan.