Tramp AQSh davlat organlarida Kasperskiy antivirusidan foydalanishni taqiqladi

AQSh davlat organlarida “Kasperskiy laboratoriyasi” kompaniyasi mahsulotlaridan foydalanish rasman taqiqlandi. Prezident Donald Tramp imzolagan 2018-yil mudofaa budjetida bu holat ko‘zda tutilgan, deb xabar beradi TJournal.

Tramp ma’muriyati muqaddam Oq Uydagi fuqarolik strukturalari 90 kun ichida Kasperskiy dasturlaridan foydalanishni to‘xtatishi borasida direktiva chiqargan edi. Shundan so‘ng Kaspersky Vashingtondagi ofisini yopgan edi.

Yangi hujjatga ko‘ra, bu holat nafaqat fuqarolik strukturalariga, balki harbiylarga ham oiddir.

“Ushbu qonun loyihasini allaqachon qabul qilish kerak edi”, — ma’lum qildi o‘zgartishlar tashabbuskorlaridan biri, senator Jin Shaxin. Uning so‘zlariga qaraganda, Kasperskiy antivirusi AQSh milliy xavfsizligiga jiddiy xavf uyg‘otadi.