Jeremi Ranner, Emma Uotson va Skarlett Yoxansson eng ko‘p daromad keltiradigan aktyorlar deb topildi

Forbes kinostudiyalarga eng ko‘p daromad keltiradigan Gollivud aktyorlari ro‘yxatini e’lon qildi. Bu haqda “RIA Novosti” xabar bermoqda.

Mazkur reytingdagi birinchi o‘rinni filmdagi ishtiroki gonoraridan 94 marotaba ko‘p kassa yig‘imini kafolatlaydigan Jeremi Ranner egalladi. U “Bajarib bo‘lmas topshiriq” franshizasi va Kapitan Amerika haqidagi filmlar tufayli yetakchiga aylangani aytilmoqda.

Ikkinchi o‘rindan aktrisa Emma Uotson joy olgan. U qatnashgan so‘nggi uch film, jumladan, “Sohibjamol va Maxluq” myuzikli namoyishi studiyalarga aktrisaga to‘langan har bir dollarning 70 dollar bo‘lib qaytishini ta’minlagan.

Eng ko‘p daromad keltiruvchi kino yulduzlari uchligini Skarlett Yoxansson to‘ldirgan. Uning “foyda keltirish” ko‘rsatkichi 1 ga 66 nisbatini tashkil etmoqda. Aktrisa uchun “Qasoskorlar: Altron erasi” va “Birinchi qasoskor: Qarama-qarshilik” filmlari ayniqsa muvaffaqiyatli chiqqan.

Forbes ushbu reytingni tuzishda 2017-yilning 1-iyuniga qadar namoyishga qo‘yilgan kartinalarni inobatga olgan.