Putin Trampga AQSh Peterburgdagi terakt oldini olishda yordam bergani uchun minnatdorlik bildirdi

Rossiya prezidenti Vladimir Putin AQSh prezidenti Donald Tramp bilan telefon orqali muloqotda bo‘ldi va unga Sankt-Peterburgdagi terakt oldini olishda yordam bergan Markaziy razvedka boshqarmasi axboroti uchun minnatdorlik bildirdi, deb yozadi “Gazeta.ru”.

“Rossiya prezidenti amerikalik hamkasbiga AQSh Markaziy razvedka boshqarmasining Sankt-Peterburgdagi Qozon soborida, shuningdek, shaharning boshqa gavjum joylarida portlashlarni tayyorlagan terrorchilar guruhi iziga tushish, ularni qidirib topish va qo‘lga olishda yordam bergan axboroti uchun minnatdorlik bildirdi”, — deyiladi prezident matbuot xizmati xabarida.

Putin Trampdan MRB qo‘mondonligiga hamda tezkor ma’lumotni qo‘lga kiritgan xodimlarga rahmat aytib qo‘yishni so‘radi.