Surxondaryoda aldov orqali mahalladoshlaridan 3 ming dollar olgan fermer qo‘lga olindi

Surxondaryo viloyatining Denov tumanidagi Surxon-Diyor mahallasida istiqomat qiluvchi fermer M.K fermer xo‘jaligi yer maydonida noqonuniy qurilgan uy-joylarni xususiylashtirish bahonasida ikki mahalladoshini aldadi, deb xabar beradi O‘zA.

Fermer 2017-yil noyabr oyida shu maqsadda ulardan uch ming dollar oladi. Keyinchalik fuqarolardan biriga ming dollarni qaytarib bergan fermer boshqasining ikki ming dollarini o‘z xarajatlariga sarflab yuboradi.

Tergov-surishtiruv ishlari davomida fermer yer maydonida qonunga zid ravishda uy-joy qurgan ikki mahalladoshidan kadastr hujjatlarini tayyorlab berishga yordamlashsish vaji bilan shu yil fevral oyida ham pul olgani ma’lum bo‘ldi.

Surxondaryo viloyat ichki ishlar boshqarmasi ma’lumotlariga ko‘ra, yakunlanayotgan yil vohada firibgarlik bilan bog‘liq jinoyatlar o‘tgan yilning shu davriga nisbatan 70 taga kamayib, 315 tani tashkil etgan.