“Golos” loyihasi 6-mavsumining g‘olibi aniqlandi

29-dekabr, juma kuni Rossiya Birinchi kanalidagi “Golos” loyihasi 6-mavsumining finali bo‘lib o‘tdi. Musiqiy shouning navbatdagi mavsumida Selim Alaxyarov birinchilikni qo‘lga kiritdi, deb xabar berdi “RIA Novosti”.

Shou finaliga Ladislav Bubnar (Chexiya), Selim Alaxyarov (Maxachqal’a), Timofey Kopilov (Vladimir) va xitoylik Yan Ge chiqqan edi. Loyiha g‘olibi jonli efir vaqtida teletomoshabinlarning ovozlari orqali aniqlandi.

6-mavsumda ishtirokchilarga Pelageya, Dima Bilan, Leonid Agutin va Aleksandr Gradskiy ustozlik qildi.

Birinchi kanalning musiqiy va ko‘ngilochar dasturlar bo‘yicha bosh prodyuseri Yuriy Aksyut g‘olibga 1 million rubl hamda Ford Focus avtomobilini sovg‘a sifatida topshirdi.

Eslatib o‘tamiz, “Golos” loyihasining 5-mavsumida o‘zbekistonlik qo‘shiqchi Sardor Milano 4-o‘rinni egallagan edi.