Bektemirda to‘xtatilgan avtomobil salonidan marixuana topildi

Toshkent shahar IIBB YHXB xodimlari tomonidan o‘tkazilgan tadbir davomida “Bektemir” YPX maskanida 1996-yilda tug‘ilgan Javohir Mamarasulov boshqaruvidagi Lacetti avtomobili to‘xtatib, tekshirildi. Bu haqda IIBB matbuot xizmati xabar bermoqda.

Tekshiruv davomida avtomashina salonidan og‘irligi 2,74 gramm bo‘lgan marixuana topildi.

Mazkur holat yuzasidan Bektemir tumani IIB huzuridagi tergov bo‘limi tomonidan JKning 276-moddasi 1-qismi (giyohvandlik vositalarini o‘tkazish maqsadini ko‘zlamay, qonunga xilof ravishda saqlash) alomatlari bilan jinoyat ishi qo‘zg‘atildi.

Hozirda dastlabki tergov harakatlari davom ettirilib, uning boshqa jinoyatlarga aloqadorligi tekshirilmoqda.