AQSh aeroportlarida parolni aytishdan bosh tortgan sayyohlardan gadjetlari olib qo‘yiladi

AQSh aeroportlarida pasport nazorati kuchaytirildi. Xavfsizlik xizmati xodimlari qurilma parolini aytishdan bosh tortgan yo‘lovchilarning har qanday gadjetini musodara qilish vakolatiga ega bo‘ldi. Bu haqda The Sun nashri xabar bermoqda.

Avval chegarachilar noutbuklar va smartfonlarni yuzaki ko‘zdan kechirish va yo‘lovchilarni keyingi tekshirishga yuborish huquqiga ega edi.

“Sayohatchilar elektron qurilmalar va ulardagi ma’lumotlarni ularni tekshirish imkonini beruvchi holatda taqdim etishga majbur”, — deyiladi yangi qoidalarda.

Chet elliklar gadjetlaridagi barcha ma’lumot bilan tanishish imkonini taqdim etmasa, ularga AQSh hududiga kirish taqiqlanishi yoki qurilma musodara etilishi mumkin.